Praza pública Blogs
Hoxe en Praza:

O Galiñeiro

O blog de teatro de Praza Pública
Sobre o blog  

COMO PEIXES FÓRA DA AUGA

“EXCESO DE CONVERSA ENTRE GAIVOTAS” de Anómico Teatro. Con texto e iluminación de Pedro Fresneda. Dirección de Julio Fernández. Actuación de María Costa e Eva Alfonso, quen presenta este espectáculo para o seu Traballo Fin de Carreira en Arte Dramática, na especialidade de Interpretación, na Esad de Galicia.

IV VIGO EN BRUTO 2014 de Ensalle Teatro.

COMO PEIXES CONXELADOS POLA EDUCACIÓN, nadando río arriba e contracorrente, por entre feixes de garabullos.

“EXCESO DE CONVERSA CON GAIVOTAS” de Anómico Teatro recorre a unha paisaxe metonímica, composta polos restos de garabullos que arrastra o mar ás súas beiras. Arrinca o espectáculo nunha clave de teatro visual a base das fotos fixas coas poses das actrices Eva Alfonso e María Costa. Dúas figuras semi-núas cunhas chaquetas decoradas con peles de animais que adoptan expresións dunha superioridade xélida e distante.

De aí pasan a un rexistro próximo á convención da “performance” e do “teatro físico”, traballando na horizontal, arrastrándose polo chan ciscado de restos de pólas e fragmentos de madeiras gastadas. Móvense como peixes na cesta de bimbio do pescador, como peixes fóra da auga, abaneándose agonicamente entre as estelas, dando coletazos e guindándoas contras as paredes.

Despois introducirán un obxecto con resoancias simbólicas, ou por proximidade da súa morfoloxía e materia á temática subxacente, resoancias metafóricas: trátase de peixes conxelados dentro de pequenos bloques de xeo que as actrices lanzan desde os laterais facéndoos atravesar o escenario entre o caos dos paus secos.

Pouco a pouco, emerxe o texto de Pedro Fresneda enunciado directamente ao público, sen crear un diálogo dramático que responda a estratexias para acadar uns obxectivos ficcionais, senón como unha acción verbal discursivo-ilustrativa na que, como adoita acontecer na poética de Fresneda, alanca unha certa intención persuasiva, na que abundan as profesións de fe, as declaracións ideolóxicas e as reflexións sociopolíticas, tecidas con mínimos cambios na direccionalidade desa voz descritiva e denunciadora. Voces alén da configuración dunha situación dramática, ou dunha configuración de personaxes. Voces ceibes en rebelión.

Julio Fernández dirixe un espectáculo no que a cinestesia, o traballo corporal, espacial e obxectual configuran un tecido entre a “performance” e a “instalación plástica”, nun rexistro abstracto moi evocativo, con elementos cargados de simboloxía que serven de nexo co texto de Fresneda. No entanto, o traballo co texto segue unha liña paralela, que se cingue ao que acabo de mencionar neses intersticios, entre simbólicos e metafóricos, feitos de movementos, obxectos, e esa dimensión abraiante que lle achegan as atmosferas lumínicas deseñadas polo mesmo Pedro Fresneda.

Así, en “EXCESO DE CONVERSA CON GAIVOTAS”, entre o ton agónico, a rabia, a melancolía, a acusación e a denuncia… xorden zonas de beleza e arrouto entre chairas que ceden á contemplación testemuñal dunha incipiente apocalipse fría.

Afonso Becerra de Becerreá.

MITEU 2014: Riqueza de propostas, artes e culturas. Lusofonía

Texto publicado o sábado en Praza.com, un día despois da entrega de premios e peche do festival. Podes lelo no propio xornal e compartilo aquí.

Foi a deste ano unha MITEU que mantivo a calidade e a innovación dos últimos tempos, multidisciplinar coma sempre (teatro adulto e infantil, profesional e amador, de rúa, comedia, drama, musical, realismo e surrealismo, poesía, danza contemporánea, expresión corporal, performance, maxia, mimo, clown, monicreques, música, monólogo e cine documental) coa presenza e reivindicación acostumada de outras culturas (4 continentes e 9 países, entre eles Guinea Ecuatorial, Brasil, Angola, Portugal, Xapón, Escocia e Italia), as propostas sorprendentes como os monicreques para adultos ensinando o Marqués de Sade (“Pigmalião. Escultura que mexe”, desde Brasil), o clown e mimo (Yllana, Johnny Melville, Les Grotesques), a danza oriental mesturada coa galega (Hisako Horikawa con Felisa Segade, de Leilía), a música e cultura galegas mesturadas co blues estadounidense (Boneca Lareta, con Luís Iglesia e Xabier Deive), a denuncia social e política (Maricastaña), a veces con tintes líricos, humorísticos ou surrealistas (Aula de Santiago, Aula da UPNA de Navarra, Aula de Burgos), ou inserta nun musical (Obras Públicas).

Foi a deste ano unha MITEU que mantivo a calidade e a innovación dos últimos tempos, multidisciplinar coma sempre

A experimentación poética co corpo, o ritmo, a plástica e o movemento (Gruppo Limpido de Xénova, Teatr’Ubi de Covilhã, TEUC de Coímbra, TUP do Porto, Aula de Santiago, Aula de Lugo e diversas aulas e compañías de danza galegas), os espazos e escenografías novidosas (Aula da Coruña, Aula de Lugo), o teatro de rúa (Aula de Burgos, Rosaura), o teatro infantil (Geppetto), a performance (Gruppo Limpido, Aula de Burgos), a cultura, os relatos e a música doutras culturas (Gorsy Edu dende Guinea Ecuatorial, Gretua de Aveiro dende Portugal, Hisako Horiwaka dende Xapón, Alberto Mvundi dende Angola), os monólogos e diálogos humorísticos (Quico Cadaval, José Carlos Illanes, Iolanda Muíños e Camila Bossa), o surrealismo e a parodia (Cordelia, Aula de Burgos), a música (Gorsy Edu, Alberto Mvundi, Corasons, Boneca Lareta, Felisa Segade, Josito Porto, Sabela Dacal e ata José Carlos Illanes), a inspiración de autores como Lorca e Sarah Kane (Aula de Lugo, Aula de Santiago), ou mesmo o teatro isabelino de Shakespeare (Les Grotesques) e o auto sacramental de Lope, mais adaptados ao século XXI.

Dende o blog de teatro de Praza Pública O Galiñeiro, queremos salientar os traballos de Teatr’Ubi, a Aula de Teatro da Universidade de Santiago, Gorsy Edu, Gruppo Limpido con Andrea Gado, Obras Públicas e Boneca Lareta

A lusofonía tivo un espazo especial nesta edición, grazas á colaboración das Cuartas Xornadas de Portugués Perto e o Campus de Ourense, que trouxeron a Quico Cadaval e o espectáculo musical Corasons, co seu documental e algunhas das artistas participantes, Uxía, Carlos Blanco, Najla Shami, Xoán Curiel, Magín Blanco e Sérgio Tannus. Ademais, os contos clásicos portugueses de Gretua de Aveiro, ou a presentación de Os Contos do Joselín, Primeiros documentos sonoros do teatro galego 1929-1949, libro-CD, a cargo da Central Folque, Laura Tato, Ramón Pinheiro e Quico Cadaval, nun festival xa de seu galego e mestizo. O compromiso coa realidade, ademais de estar presente en moitas das obras, levounos por medio do cine documental a realidades como a de Exipto, en colaboración co Cineclube Padre Feijóo da cidade das Burgas. Durante quince días, Ourense foi capital internacional das artes escénicas.


Dende o blog de teatro de Praza Pública O Galiñeiro, queremos salientar os traballos de Teatr’Ubi, a Aula de Teatro da Universidade de Santiago, Gorsy Edu, Gruppo Limpido con Andrea Gado, Obras Públicas e Boneca Lareta.




Portugal e Galicia triunfan nunha MITEU marcada pola lusofonía

Texto publicado o sábado en Praza.com, un día despois da entrega de premios e peche do festival. Podes lelo no propio xornal e compartilo aquí.

“A festa do teatro debe continuar”. Así dicía onte Xan Cejudo, histórico actor, director e dramaturgo do teatro galego, cando recollía o seu premio de honor a toda unha vida de traballo, concedido pola organización da 19ª edición da MITEU (Mostra de Teatro Universitario de Ourense). E dicíao como peche a toda unha carreira, mais tamén a un ciclo histórico, e é que a “crise” económica e os recortes nuns sectores xa de por si pouco atendidos, como o teatro e por extensión a cultura, así como o desleixo da Xunta e Goberno estatal, foron algunhas das denuncias desta edición e un dos eixos da entrega de premios que pechou onte o festival.

A organización salientou a Xan Cejudo como “peza clave na profesionalización do teatro galego, mestre de actores e directores fundamentais do teatro galego”

E así, minutos antes de proceder á entrega de premios, a compañía Sarabela e actores e actrices membros da organización escenificaron unha peculiar e hilarante historia de terror, “Mantén a túa actividade cultural”, composta por personaxes de moitas películas de xénero, na que denunciaron con moito humor o abandono da cultura e o teatro por parte da Administración.

Amais do emotivo recoñecemento a Xan Cejudo, ao que a organización salientou como “peza clave na profesionalización do teatro galego, mestre de actores e directores fundamentais do teatro galego, realizando un labor imprescindible como director, actor e intelectual da nosa escena dende O Facho ata o CDG, pasando por Moucho Clerc ou polo audiovisual galego”, entregáronse os galardóns ás compañías e montaxes distinguidos polo xurado e polo público. 

Os teatros galego e portugués triunfaron ao repartirse os catro premios. O do xurado Carlos Couceiro e Begoña Muñoz recaeu sobre a montaxe “Corpo em crise”, do TEUC de Coímbra, e das votacións do público, en “Apnea (Variación 2ª)”, da Aula Universitaria de Santiago dirixida por Roberto Salgueiro. Os premios Suso Díaz á mellor resolución técnica, que conceden os técnicos do Teatro Principal e o Auditorio foron, no caso do primeiro espazo, para “Nocturnos”, da Aula Universitaria de A Coruña, e no do segundo, para “Diagnóstico: desgusto patolóxico”, de Teatr’Ubi de Covilhã, dirixida por Rui Pires. Os técnicos aproveitaron a entrega deste premio para denunciar a precariedade neste sector, moi afectado polos recortes impostos dende as distintas administracións.

Foi o peche a unha edición que mantén a calidade e, á espera das cifras oficiais, tamén o nivel de asistencia, segundo manifestou Fernando Dacosta, o director da mostra: “Foi un ano moi positivo, e malia a que aínda falten por comprobar sobre o papel os números, cremos que o dos espectadores mantívose”. O público, segundo manifestou a organización da mostra, “valorou a calidade no terreo artístico das obras presentadas e tamén a variedade da oferta. Destacaron, entre outros, o espectáculo de Guinea Ecuatorial, polo seu carácter emotivo; o dos brasileiros e o seu marqués de Sade, polo sorprendente e provocativo; e tamén a compañía galega Sobre rodas, ou a clásica presenza de Yllana”.

O vindeiro ano a MITEU celebrará vinte anos ofrecendo o mellor teatro universitario e profesional que se pode contemplar no Estado

Tras o acto de clausura celebrado no Teatro Principal, o grupo de teatro universitario “de casa”, Maricastaña, interpretou “Café Liberdade”, unha obra escrita e dirixida por Fernando Dacosta, que ademais de director do festival é coordinador da Aula de Teatro Universitario e director do seu terceiro e máis avanzado nivel, a compañía Maricastaña. E como fin de festa, a proposta entre musical e teatral de dous dos “malos” máis importantes do audiovisual galego, Luís Iglesia B. e Xabier Deive, con Boneca Lareta, entre o blues da América máis profunda e a retranca máis galega, e o humor pícaro e descarado dos “Malos Hábitos” de outras dúas grandes actrices galegas, Iolanda Muíños e Camila Bossa.

O vindeiro ano a MITEU celebrará vinte anos ofrecendo o mellor teatro universitario e profesional que se pode contemplar no Estado.

YLLANA E CORASONS. MÚSICA LUSÓFONA, DOCUMENTAL, MIMO, CLOWN E MÁIS TEATRO UNIVERSITARIO

A 3 días de rematar a MITEU, hoxe o mellor festival de teatro universitario de Galiza e do Estado ofrécenos música e teatro de primeiro nivel, da man de artistas como Uxía Senlle, Sérgio Tannus, Magín Blanco ou Yllana.

ÁS 19.00 terá lugar no Campus de Ourense o espectáculo 
CORASONS
 (DOCUMENTAL + CONCERTO)

 
AUTOR: COLECTIVO CORASONS  (GALICIA-PORTUGAL)

* Organizado polas Cuartas Xornadas de Portugués Perto e o Campus de Ourense


LUGAR: CAMPUS UNIVERSITARIO (SALA MARIE CURIE - EDIFICIO POLITÉCNICO) 
HORA: 19’00 
DURACIÓN: 100 MINUTOS (Documental + concerto)
TARIFA: LIBRE

Como unha afección persoal pode rematar nun grande intercambio cultural entre varios países? Por que dun día para outro a xente comeza a facer fotos que lle lembran corazóns? Todo comezou nunha páxina de internet chamada «Quem ve corações», na que Isabel Leal foi publicando unha serie de textos e fotografías co «leitmotiv» dos «corazóns casuais», figuras de corazóns atopadas na natureza e dispersas polo mundo adiante. A Casa das Crechas foi o sitio idóneo para que un pequeno grupo de persoas se xuntasen coa escusa de dar un concerto para inaugurar a exposición das fotos de Isabel. Acababan de nacer os CoraSons. Na Semana Santa de 2012 xa eran máis de 40 artistas os que se xuntaron na Illa de Arousa para dar un concerto único. Este documental musical pretende deixar constancia desta historia. Unha historia diferente. Unha historia única. Unha historia de amizade. Mini-concerto para ilustrar o documental.

CON: Carlos Blanco, Dani Juncal, Najla Shami, Xoan Curiel, Uxía, Paco Abelleira, Magín Blanco, Tatán, Pablo Vidal , Sérgio Tannus e Isaac Palacín 
DIRECCIÓN: Colectivo CoraSons / Paco Abelleira (director do documental)

Ás 20.30, no Teatro Principal, a AULA DE TEATRO NORMAL DA UNIVERSIDADE DA CORUÑA (GALICIA), co espectáculo “Nocturnos” 

 

AUTOR: PACO ZARZOSO
LUGAR: TEATRO PRINCIPAL 
HORA: 20’30 
DURACIÓN: 60 MINUTOS
TARIFA: 3 €

Panorámica nocturna das aforas dunha cidade á beira do mar. Algúns habitantes saíron esa noite sen o paraugas que os protexe da choiva de meteoros e estrelas.

E ás 23 horas, dende o Auditorio, a célebre compañía YLLANA (MADRID), co espectáculo “Action Man” 

AUTOR: RAÚL CANO (idea orixinal)
LUGAR: AUDITORIO 
HORA: 23’00 
DURACIÓN: 75 MINUTOS
TARIFA: 5 €

Neste espectáculo Raúl Cano, só sobre o escenario, dá vida a diversos personaxes e situacións, despregando grandes dotes mímicas, un xeneroso dominio do corpo cun estilo propio, e utilizando sempre unha magnífica e precisa sonorización. 
O personaxe principal, un Superaxente Especial na súa última misión, vese inmerso nunha serie de situacións cómicas que beben do mellor humor cinematográfico, televisivo e do cómic. 
Raúl Cano é actor e coautor de espectáculos de Yllana como «¡Muu!», «Glub Glub», «666», «Star Trip» e «Brokers». Tamén o vimos en series de televisión como «La Tira», «La que se avecina», «Chic-cas» e «La hora de José Mota». Agora embárcase na súa primeira película de acción teatral. Esperemos que non a cague!

HOXE: AVEIRO E OBRAS PÚBLICAS. MUSICAL, TEATRO EXPERIMENTAL, HUMOR E CONTOS PORTUGUESES

Hoxe, domingo 4 de maio, a cinco días do peche da MITEU, poderemos desfrutar:



ás 20.30 horas, de GRETUA (GRUPO EXPERIMENTAL DE TEATRO DA UNIVERSIDADE DE AVEIRO) (AVEIRO - PORTUGAL), co espctáculo Contos ao palco 

AUTORES: VERGÍLIO FERREIRA e BRANQUINHO DA FONSECA

LUGAR: CAMPUS UNIVERSITARIO (SALA PARDO BAZÁN - MULTIUSOS) 
HORA: 19’00 
DURACIÓN: 45 MINUTOS
TARIFA: 3 € 

Contos ao palco é un proxecto de adaptación dramatúrxica de contos xerados no universo portugués. O reavivar e a recreación de lembranzas dunha tradición esvaída nos tempos. Un proceso continuo de adaptación e construción micro teatral. A historia dentro da historia. O que acontece antes dun conto ou o que pode ocorrer despois. Así, o primeiro conto «As Mans Frías» de Branquinho da Fonseca, explora a morte lixeiramente tratada. Perturbadas vidas representadas, vidas acomodadas e mal amadas. O segundo conto «A palabra máxica», de Vergílio Ferreira, retrata as peripecias da lingua como «ser vivo». A palabra é o trunfo da ignorancia.



 

E ás 23 horas: OBRAS PÚBLICAS (GALICIA), co espectáculo “Bye Bye Honey”, de JOSÉ PRIETO 

LUGAR: TEATRO PRINCIPAL 
HORA: 20’30
DURACIÓN: 80 MINUTOS 
TARIFA: 5 €

Bye, Bye, Honey conta a historia de Marta, unha rapaza de barrio, que non é un anxo nin é un demo, e que cando decide deixar a súa casa e a súa familia emprende un camiño incerto e perigoso, rodeada por todas partes e «Lumpen, pachanga e rock&n roll.

HOXE NA MITEU: JOSITO PORTO E ANDREA GADO. CORPO, DANZA, MÚSICA, HUMOR E VIAXE AO NOSO INTERIOR


image

Hoxe sábado 3 de maio, traspasado o ecuador da 19ª edición da MITEU, teremos a oportunidade de desfrutar do teatro experimental e sempre á vangarda do xa habitual por estes lares e amigo italiano da mostra Gruppo Limpido, de Xénova, con xa varios premios e mencións ás costas e a interpretación desta volta do actor Andrea Gado e a súa busca da vangarda na interpretación e suxerencia co corpo. Tamén no eido da expresión corporal andarán as múltiples compañías de baile de toda Galiza que participrán no IV Encontro Interuniversitario de Danza. Na busca e viaxe ao interior, mais a través dunha obra disparatada e exótica de creación colectiva conducirannos "Sobre Rodas", mentres que para pechar a xornada Josito Porto e o seu proxecto musical, acompañado do acordeón de Sabela Dacal, adentrarannos na madrugada do domingo da man da súa Factoría de Subsistencia.

image


Ás 19 horas, no Centro Cultural da Deputación, GRUPPO LIMPIDO
 (XÉNOVA - ITALIA), co espectáculo  Atto (Corpo unico) 

AUTOR: ANDREA GADO
LUGAR: CENTRO CULTURAL DA DEPUTACIÓN 
HORA: 19’00 
DURACIÓN: 45 MINUTOS
TARIFA: LIBRE

Un corpo. Unha perfomance. Un acto único –onde a trama sempre é a mesma pero non a acción. «Atto (corpo unico)» segue a persoal búsqueda actoral de Andrea Gado sobre a relación corpo/son/ruidos/música/ voces e sobre o espazo no que se actúa, espazo ao redor do cal incluir outros corpos, miradas activas– estudantes de arte ou pintores, chamados a traducir no papel a acción escénica.



Un par de tráilers para a mostra:

https://www.youtube.com/watch?v=xPXexs6Tr5w&feature=youtu.be

https://www.youtube.com/watch?v=BA8EeSSqh6A

image

Ás 20.30, no Teatro Principal, SOBRE RODAS (GALICIA), co espectáculo Sobre rodas”

AUTOR: CREACIÓN COLECTIVA
LUGAR: TEATRO PRINCIPAL
HORA: 20’30 
DURACIÓN: 70 MINUTOS 
TARIFA: 5 €

Unha mistura de sete exóticas cores na procura de si mesmas. Sete corazóns pedaleando sobre quince rodas en dirección a ningunha parte. 
Unha peculiar e disparatada familia cuns membros tan diferentes coma semellantes, que a pesares de non ter unha lingua común, comunícanse e compleméntanse á perfección formando unha engranaxe irrompible. 
Sobre as súas bicicletas e coa súa equipaxe chea de ganas de xogar e descubrir novos lugares e sensacións, farannos acompañalos nunha viaxe ao noso interior, ao interior das nosas inquedanzas, dos nosos soños, da nosa infancia e das nosas búsquedas.


Ás 23 horas, no Auditorio:

4º Encontro de Danza Interuniversitaria image



GRUPOS E PEZAS : 

COMPAÑÍA DE DANZA DA USC-COMPOSTELA 
Onde se fugan as valentes 
«DO-OU-TRAS» AULA DE DANZA CAMPUS DE OURENSE 
Luz e materia 
AULA DE DANZA DA UDC - DANZA NORMAL, A CORUÑA 
Animais de hábitos nocturnos 
TICS (ESPAZO PARA A FORMACIÓN EN DANZA E OUTRAS ARTES) 
Eran tempos modernos 
MIRIAM CENTRO DE DANZA, OURENSE 
Pasión 
PROCEDENCIA: GALICIA

LUGAR: AUDITORIO 
HORA: 23’00 
DURACIÓN: 75 MINUTOS
TARIFA: 3 €

ONDE SE FUGAN AS VALENTES: Nesta peza a experiencia dun encontro entre mulleres é o punto de partida. Pola contra os puntos de fuga serán a nosa escusa para atoparnos, e polo tanto a nosa protección. Non importa o pasado; só o presente que se atopa entre o aquí e o agora. Agora é o momento, imos visibilizar o invisible, ser parte dos lugares que foxen e perdernos entre os froitos dos encontros e desencontros. 
LUZ E MATERIA: Trabállanse exercicios que exploran a relación entre a luz e o corpo, encadeadamente un exercicio dá lugar ao seguinte exercicio e ao material escénico. Se un compañeiro leva cos ollos vendados a outra compañeira por diferentes lugares, ao rematar describen por escrito o paseo, logo elixen unha frase, traballamos sobre esa frase: a loita contra o medo a caer, para montar unha coreografía… 
ANIMAIS DE HÁBITOS NOCTURNOS: A maioria dos animais amosan patróns de comportamento non moi diferentes aos das persoas. Trocar o día pola noite é parte do estilo dalgúns animais. Os animais nocturnos teñen os sentidos máis aguzados. Os seus corpos posúen adaptacións especiais que desenvolven capacidades únicas para atrapar a súa presa. A pesar de que este comportamento é oposto á natureza diúrna do estilo de vida humana, estes animais engaden calidade a todo o reino animal. 
ERAN TEMPOS MODERNOS: Comedia bulizosa con pobreza, farsa, sensibilidade, golpes, bromas esaxeradas de humor crú, argumento sinxelo que supera sempre os límites do sentido común… «ERAN TEMPOS MODERNOS». 
PASIÓN: Homenaxe ao espírito anovador creativo.


 image

E á 1.00, xa domingo…

FACTORÍA DE SUBSISTENCIA
 (GALICIA), en Concerto acústico 

AUTOR: JOSITO PORTO
LUGAR: CAFÉ AURIENSE 
HORA: 01’00 
DURACIÓN: 75 MINUTOS
TARIFA: CONSUMICIÓN

Concerto acústico de temas propios de Josito Porto que toca a guitarra acompañado polo acordeón e as voces de Sabela Dacal.

image


HOXE NA MITEU: JOHNNY MELVILLE. MIMO, CLOWN, HUMOR E DENUNCIA SOCIAL



Hoxe, no 7º capítulo da 19ª edición da MITEU, o mellor festival de teatro universitario de Galiza e do Estado, teremos a oportunidade de gozar da presencia dun artista internacional: Johnny Melville. O cómico, mimo e clown escocés traénos unha compilación dos seus mellores gags. E antes, o xa clásico e habitual por estes lares, grupo amigo da MITEU, o da UPNA (Universidade Pública de Navarra), presentando o seu último espectáculo.

image


Ás 20.30, no Teatro Principal, o GRUPO DE TEATRO DA UPNA (UNIVERSIDADE PÚBLICA DE NAVARRA) 
(NAVARRA), co espectáculo Fantasía de los contrastes ”

AUTOR:
 ANTONIO MARTÍNEZ BALLESTEROS
LUGAR:TEATRO PRINCIPAL
HORA: 20’30

DURACIÓN: 90 MINUTOS
TARIFA: 3 €

"Pequenas escenas, algunhas incluso en clave de humor, que fan referencia á fractura que esta crise está deixando na nosa sociedade, onde o que ten moito cada vez ten máis e o que ten pouco cada vez ten menos. Unha crise que está pagando fundamentalmente o traballador. O pouco que queda…"

Un teaser

E ás 23 horas, no Auditorio Municipal: 
JOHNNY MELVILLE (ESCOCIA), co espectáculo Best of Johnny” 

image



AUTOR: JOHN SWAN MELVILLE 
LUGAR: AUDITORIO
HORA: 23’00
DURACIÓN: 75 MINUTOS 
TARIFA: 5 €

"Humor Xestual, Mimo e Clown. En «Best of Johnny», Melville preséntanos unha especie de recompilación das súas montaxes anteriores, escenas que se enriquecen co que lle pide o corpo no momento da representación e co que lle transmite o público. Na obra Melville desenvolve varios «sketchs» parodiando os pros e os contras da Comunidade Económica Europea. Presenta a un terrorista anti-comunidade europea que vai acompañado do seu suxo e perigoso criado Igor, encargado de asasinar a políticos importantes. Un espectáculo e tema que volve estar de plena actualidade. Só hai un home que pode impedilo: Sylvester Ordnance Salmón, (SOS) unha especie de James Bond que foi encargado de velar pola seguridade do Vello Continente. Ademais, veremos un partido de fútbol en directo cun dos mellores xogadores do momento a piques de marcar un gol apoteósico. Penetraremos nun hospital para ollar de preto a Sanidade Pública e amosar que, ás veces, vale máis a pena desenvolver un plan propio para tolear. Finalmente, unha banda de rock heavy acabará dando un concerto cun volume e estilo moi particular. En resumo, un espectáculo incrible e cheo de risos e momentos inesquecibles".

Aquí un teaser. Non volo perdades!

image

MITEU. HOXE: 6º CAPÍTULO DA 19ª TEMPADA

Hoxe: 6º capítulo da 19ª tempada do mellor festival de teatro universitario de Galiza e do Estado, con xénero negro danza e expresión corporal.



Ás 20.30, TEATRO EL MAYAL da UNIVERSIDADE DE LEÓN (CASTELA - LEÓN), co espectáculo “La patada”

AUTORES: ANDRÉS VEIEL e GESINE SCHMIDT
LUGAR: TEATRO PRINCIPAL 
HORA: 19’00 
DURACIÓN: 90 MINUTOS
TARIFA: 3 € 

Na noite do 12 ao 13 de xullo de 2002, Marco e Marcel Schönfeld e o seu amigo Sebastian Fink, maltrataron a Marinus Schöberl, de 16 anos. Ao final matárono saltándolle sobre a caluga. Catro meses máis tarde, en novembro, atopouse o seu corpo nun pozo negro. Os asasinos e a vítima coñecíanse. Eran orixinarios de Potzlow, un pobo ubicado a 60 km. ao norte de Berlín.



E ás 23 horas, atención, no Auditorio Municipal, TUP. TEATRO UNIVERSITÁRIO DO PORTO (PORTUGAL), con “Já gastámos as palavras”




AUTOR: VICTOR HUGO PONTES
LUGAR: AUDITORIO 
HORA: 20’30 
DURACIÓN: 55 MINUTOS
TARIFA: 3 € 

Ao longo de 65 anos, xa moita cousa foi dita polo TUP, xa moito se falou. En «Já Gastámos as Palavras» propoñemos expresarnos dunha forma diferente. Desta vez, deixamos as palabras fóra, porque xa están gastadas. Como colectivo, procuramos unha voz interior singular e plural ao mesmo tempo. 
Xa varias veces tentei escribir un texto sobre este proxecto, e non o consigo. Por máis que intente, non podo. Edward Hopper dixo: «Se eu puidese expresarme por palabras, non habería razóns para pintar». Probablemente «xa gastamos as Palabras» e agora só podemos expresarnos a través dos xestos. Estes xestos non poden ser explicados por palabras: se puidésemos dicilos, non habería razón para danzalos. 
Víctor Hugo Pontes




MITEU. HOXE, quinto capítulo da 19ª tempada do mellor festival de teatro universitario de Galiza e do Estado, con monicreques adultos, percusión e danzas tradicionais doutras culturas, coas seguintes “estrelas convidadas”: 

Ás 20.30, o grupo 
PIGMALIÃO. ESCULTURA QUE MEXE (BRASIL, MINAS GERAIS), co espectáculo “A filosofía na alcova”

AUTOR: MARQUÉS DE SADE
LUGAR: AUDITORIO 
HORA: 20’30 
DURACIÓN: 80 MINUTOS
TARIFA: 5 € 

"A Filosofía na Alcova é unha libre adaptación da obra homónima de Marqués de Sade. O espectáculo utiliza unha técnica de manipulación pouco coñecida no Brasil, que permite movementos precisos e realistas ás marionetas de fíos. Reunindo no escenario seis actores que manipulan e interactúan cos monecos, a posta en escena describe a educación sexual da fermosa e nova Eugénie, baixo os principios e a óptica dos seus singulares titores Saint-Ange e Dolmancé. Misturando discursos filosóficos sobre sexualidade, relixión e os costumes, os mestres depravados levan ao extremo as súas leccións prácticas e teóricas, defendendo o pracer por enriba de calquera regra ou lei. «A Filosofía na Alcova» convida ao público á reflexión, conxugando humor, sensualidade, terror e piedade, buscando a función máis importante do teatro: a catarse".

Un teaser

E ás 23 horas, o GRUPO FAM YA MINA PRODUCTION (GUINEA ECUATORIAL ), co ESPECTÁCULO “El percusionista”

AUTOR: GORSY EDU ABAGA
LUGAR: TEATRO PRINCIPAL 
HORA: 23’00 
DURACIÓN: 70 MINUTOS
TARIFA: 5 € 


Un músico ancián instrúe ao seu neto; a través da música transmítelle sabedorías e filosofías ancestrais. O tempo transcorre na aldea co mozo inmerso nas súas tradicións. Cumprindo co dito africano, «os días que fan medrar aos nenos son os mesmos que envellecen aos anciáns», o avó cae enfermo; como consecuencia da súa vellez comeza a perder a visión. O afán por curar ao seu avó fai que o rapaz tome a decisión de deixar a aldea e emigrar ás grandes cidades na procura do remedio. O mozo parte cara Europa -Sí beyêng- un mundo para el descoñecido, levando consigo unicamente o saber do seu pobo encerrado nas melodías e ritmos ancestrais.

praza-teatro:

Hoxe sábado 26, segundo capítulo da 19ª tempada da MITEU, con Lope de Vega, Shakespeare, auto sacramental renovado, clown, pantomima, música, monólogos cómicos e moita arte!

Ás 20.30, TECU (TEATRO CRÍTICO UNIVERSAL) da UNIVERSIDADE DA RIOXA (A RIOXA), co espectáculo “Las cortes de la muerte” (adaptación do auto sacramental).  

AUTOR: FÉLIX LOPE DE VEGA 
LUGAR: AUDITORIO (SALA AZUL) 
HORA: 20’30 
DURACIÓN: 40 MINUTOS 
TARIFA: 3 € 

LAS CORTES DE LA MUERTE é un auto sacramental de Lope de Vega. Como tal foi concibido polo «Fénix» para ser representado nas festas do Corpus Christi durante o século XVII e ensalzar os valores do misterio da Eucaristía. Relegando o contido relixioso a un plano textual, TECU trasladou a peza a un espazo onírico onde o Home é sometido a xuízo sumarísimo polo que desfilan os diferentes actores da vida: o Amor, o Pecado, a Envexa, a Loucura, a Morte, o Diaño, o Home… Sempre en clave alegórica, estes motivos encárnanse en actores para transmitirnos a extraordinaria vixencia do texto: o debate entre o ben e o mal e a posición que ocupa o Home dentro da ilusión que supón a traxedia da vida.



Ás 23’00, LAS GROTESQUES / TEATRO DE CÁMARA CERVANTES (MADRID), co espectáculo “Mucho ruido y pocas nueces”


AUTOR: WILLIAM SHAKESPEARE
LUGAR: AUDITORIO 
HORA: 23’00 
DURACIÓN: 80 MINUTOS 
TARIFA: 5 €

 Dirixidas por Sonia Sebastián, Las Grotesques abordan a adaptación da comedia «Moito ruído e poucas noces», do gran William Shakespeare. Ao seu máis puro estilo e a través dunha linguaxe física e clownesca. As tres actrices interpretan todos os personaxes da obra, amosando a súa versatilidade despregando enxeño e moito humor. 

ELENCO: Elena Lombao, Celia Freijeiro, Tusti de las Heras
DRAMATURXIA: Elena Lombao e Maribel Vitar 
COREOGRAFÍAS: Elena Lombao 
DIRECCIÓN: Sonia Sebastián

E á unha da madrugada… JOSÉ CARLOS ILLANES (GALICIA) en CONCERTO con “Solista por narices”


LUGAR: CAFÉ AURIENSE 
HORA: 01’00 
DURACIÓN: 70 MINUTOS 
TARIFA: CONSUMICIÓN

“Comedia musical-polifónica-unipersoal. Un espectáculo de humor musical con cancións orixinais, monólogos cómicos, pantomima… e moita tolemia!… Unha maneira diferente de usar un pedal Loop Station. 
Pasou por festivais como o FIOT de Carballo, o Circuito de Café teatro de Valencia, Festival Internacional de Primavera de Ciudad Real, a Gala de Pallasos sen Fronteiras… e por prazas como Madrid, Valladolid, Murcia…”